【Now.com】全運會劍擊賽事昨日（16日）於香港主場上濱，其中男子花劍個人賽，港隊主將張家朗奪銅，另一代表蔡俊彥（Ryan）就在八強止步。賽後本台及ViuTV安排MIRROR成員呂爵安（Edan）化身「一日體育記者」，訪問好友Ryan及張家朗。Edan與Ryan這對大學室友瘋狂互窒，而訪問張家朗時則表現認真一面，引起網民熱議！
相關片段：全運會｜男子花劍蔡俊彥八強止步 賽後接受呂爵安訪問指未感失落
Edan率先訪問在八強止步的蔡俊彥。兩人一見面即展開「老友式」對話，Ryan笑言：「本來好唔開心，見到你（Edan）開心好多。」他更即場發揮「窒友好本色」：「即係好似你咁，唔會因為走音就唔開心，如果唔係，你咪成日都要唔開心？」引得Edan反眼兼唞大氣。Edan隨即反擊：「咁我走音嘅頻率，應該無你輸咁多…哈哈哈哈哈哈！」蔡俊彥則笑著回應：「冇冇冇，你好少唔開心！」兩人你來我往的對話，讓氣氛變得輕鬆愉快。
至轉訪張家朗時，Edan立即收起佻皮，展現專業一面。他先禮貌鞠躬，並細心問及賽後心情。當張家朗表示對四強止步感到可惜時，Edan即提出問題：「比賽時有啲裁決好似有爭議性，有冇影響比賽節奏？」張家朗反指是自己影響了比賽節奏，承認情緒有點波動，重申裁判沒問題。最後Edan更代好友Ryan追問兩條問題，包括「對Ryan早出局有咩感受？」引得家朗笑答：「佢唔早啊，前8啦，我本身諗住幫佢報仇，點知我都輸埋！」另一條則問及關於對陣前教練的提問，展現Edan做足準備訪問。
這位特派體育記者昨晚在社交平台大晒「工作照」及證件相，留言分享採訪體驗：「突如其來的一天體育記者體驗，好玩！辛苦曬Ryan、張家朗！希望港隊19號團體賽再創佳績！」除了引來過萬爵屎點讚外，大讚偶像叻仔，更引來Ryan「搶口」回應：「唔好做歌手，以後做記者啦！」Edan則幽默回應：「你咁似啲傻瓜haters duck ng duck ga（得唔得㗎？）」。Ryan隨即幽默澄清：「大家搞清楚，我可能係傻瓜，但應該唔係hater。」更身體力行貼出為Edan投票「叱咤頒獎典禮我最喜愛男歌手」的截圖，以行動證明對好友的支持。Ryan又在Instagram留了兩個錫錫emoji，卻遭Edan嫌棄：「病就咪錫啦﹗」
另外，獲銅牌的張家朗及後在社交平台限時動態留言：「Thanh you，好多謝你哋嘅打氣聲，抱歉未能夠可以喺主場贏到金牌，不過嚟緊仲有團體賽，希望你哋支持我哋﹗」
PHOTO／Threads@edanlui、Threads@ryanchoiiiii、Instagram@cheungkalonggggg
